O tagata Ausetalia o loo sauni e malaga i atunuu i fafo ae manaomia tusifolau, e foliga mai o le a faaumiumi se taimi e faatali ai mo lea tulaga ina ua lipotia i le aso le iai o se faatuai ma laina uumi i le ofisa o tusifolau ona o le tele o talosaga.
O le ofisa i Sini i le aso ua lipotia le toatele o tagata na faatali ai mo le silia ma le ta’i fā itula mo le faafouina o tusifolau. O isi fai mai le lipoti a le 9News e ta’i lima itula na faatali ai ae toe faatonu e toe agai ane i le aso a taeao.
I totonu o nai tausaga sa faia ai vavao o le faama’i e pe ā ma le 1.4 miliona tusifolau Ausetalia ua uma le aogā ma fai mai le ofisa o tusifolau a Ausetalia pe ā ma le fā vaiaso le umi o le backlog o talosaga mo tusifolau lea e agai atu iai le ofisa mo le faatautaiga o talosaga.
