E lagona ese foi le alafai mai i le taeao analeila i tala ma lipoti o le tuumalo o le tupu tamaitai o Peretania, Kuini Elisapeta le Lua ua silafia e le lalolagi atoa.

O le faamaonia mai e le aigatupu o le tuumalo o le tupu tamaitai ua vaaia ai loimata maligi o le toatele e pei ona pueina mai i ata i le televise ma faasalalauga i upega tafailagi. 

Ua vaaia le tumutumu o tagata i luma ane o le Buckingham Palace  ma isi nofoaga o le aigatupu e faailoa lo latou mafatia faatasi ina ua faamaonia le maliu o Kuini Elisapeta.

O le toatele o le lalolagi e lei feiloai faafesagai ma Elisapeta peitai o lona talaaga ma le umi o lana nofoaiga ua lava lea e manatua ai pea o ia e tagata uma i soo se vaega o le lalolagi.

E molimau taitai o atunuu ia latou faamaisega, o se taitai iloga i le faaaloalo ma le manatunatu totoa, pulea lelei lona tagata ma faamaoni i ona tiute e oo mai lava i ona toe taimi. 

Ua avea nei la lona aloalii matua, o Salesa poo Charles ma Tupu o Peretania, ma e maliu nei Elisapeta ua 96 tausaga o lona soifua.