O le asō ua salalau ai le tala faanoanoa i le tuua o le malo e le ta’ita’i aoao o le Ekalesia Aso Fitu Samoa Tuto’atasi i le lalolagi poo le SISDAC, le susuga i le Faafeagaiga, o Alaimoana Pastor Willie Papu.
O luga o le Facebook o loo faailoa mai ai e se tasi o le ekalesia lenei tala faavauvau, ae o le a faatalitali se isi faasilasilaga aloa’ia mai le Ekalesia aemaise o lona aiga.
O le vaveao o le asō e tusa o molimau na tofā filemu ai le afioga i le ta’ita’i aoao o le SISDAC, ma e tuua le malo e le tamā faife’au ae o loo soifua pea le faletua ia Deanna Papu ma le nofoaalo.
Ua 42 tausaga ma masina e 3 talu ona ofoina atu le soifua o Pastor Willie Papu ma lona faletua mo le galuega a le Atua, mai le aso 10 o Novema i le 1983 se’ia oo mai lava i le itula na to ai lana mānava.
E tuua le malo e lana auauna, ua 86 tausaga o lona soifua.
Momoli atu ai foi faamaisega ma faamafanafanaga i le faletua ma le aiga faavauvau.
