Ua faailoa mai e i latou atamamai i tulaga tau le soifua mālōlōina e mana’omia se galuega tele e faia i le mataupu o tuipuipui o tamaiti lea o loo matua’i maualalo lava ma e ono aafia foi le atunuu i se toe pepesi o le misela e pei ona molimauina i le 2019.
O le pepesiga e silia ma le 2 afe tagata na aafia ai ma faataotolia ai le tusa ma le silia ma le 700 i falema’i e mātele lava i tamaiti i Aukilani i Saute.
Ta’ua e le ONE News na i’u ina oo atu ai ma le pepesi a le faama’i i Samoa lea na maliliu ai foi le silia ma le 70 o tagata e mātele foi i tamaiti.
O le vaiaso talu ai na fautua mai ai le WHO le faalapotopotoga o le soifua mālōlōina o le lalolagi e faapea o le tuipuipui muamua mo le misela o loo maualalo pea le numera o i latou ua faia lea tui ma ua fai mai ai i latou o health experts a Niu Sila o loo faapea foi le tulaga o loo tulai mai i le atunuu.
Fai mai le lipoti i nisi faaitu o numera lava a Maoli ma le Pasefika o loo maualalo ma ua faailoa ai e Dr Api Talemaitoga i le One News o i o loo popole iai.
Ua faamalosi mai ai ma le alii foma’i ma le latou auaunaga i tagata aemaise mātua ina ia silasila i le tulaga lea o le puipuia o le fanau mai le misela.
