E teena e se alii Samoa ua 45 tausaga le matua, ona moliaga e 33 o faiga matagā sa ia faia i se teineitiiti sa na o le 12 tausaga o lona matua i lena taimi. E teena e lenei alii ona moliaga, ona e pei ona faaleo e lana loia o loo tulai mo ia, o nei tuua’iga uma o ni mea na fatu lava e le tamaitai na aafia, ma sa malie lava le tamaitai i le faatinoga o feusuaiga sa faia ma le alii o loo molia.
O le lipoti a le NZ Herald o loo ta’ua ai, o le alii loia o Panama Leauanae o loo tulai mo lē ua molia, o se tagatanuu Samoa o Tulisi Leiataua. Ma i taualumaga o lea faamasinoga i le Faamasinoga Faaitumalo i Manukau i le aso ananafi, na faia ai e le loia mo Leiataua lana folasaga ma faapea atu i le tamaitai na aafia lea ua 24 nei tausaga o lona matua, ‘Na e fefe ma e te lei mana’o e iloa e nisi, sa e malie lava e fai lua feusua’iga ma se alii e matua atu ia te oe. Na pau le mafuaaga ua e lipotia ai lenei mea ona sa uuna’ia oe e nisi e te alu e lipoti, ua e lagona le masiasi ma ua e salamō, ma o le mea moni lena.’
Sa vave ona tetee atu lē na aafia i le manatu na ta’ua e le alii loia, ma faapea atu, ‘Na mafua ona lē faia sana tala i lena taimi ona i lona mafaufau e leai se isi o le a talitonu ia te ia.’
E lē o faataga ona faailoa le suafa o le tamaitai na aafia, ae o lē o loo molia na toe foi i Samoa ia Me o le 2014, peitai i le ono masina mulimuli ane ina ua faaulu le tagi a le tamaitai ua aafia, na faia ai e le faamasinoga se talosaga i le Faamasinoga Faaitumalo Samoa mo le toe faafoi mai o Leiataua i Niu Sila e tali i ona moliaga, ma o Mati i le 2020 na faato’ā talia ai lena talosaga ma toe faafoi mai ai Leiataua i Niu Sila.
O loo ta’ua i le lipoti e faapea e to’alua ni teineiti sa faia i ai uiga matagā e lenei alii mo se vaitaimi e fā tausaga. O le taimi lena o loo 10 ma 12 tausaga o nei teineiti ma o le tausaga e 2010 lea e ta’ua i moliaga na amata mai ai nei faiga lē alofa.
Ina ua fesiligia e le loia se tasi o i laua nei o loo aafia, na ia ta’ua ai, sa faapea lava ia i lena taimi o uiga ia e fai atu e Leiataua ia te ia o se mea masani.
‘Na amata mai lava a o 12 o’u tausaga, e masani ona tago fai ni mea mananaia e faapele ai a’u, e fai mai ana tala e uiga i lo’u tino ma fai mai ia te au, e ma te faaipoipo pe a oo ina ou matua.
‘Ae o lenei la ua faato’ā ou manino nei, sa ia taumafai e faaaogā a’u e faamalie ai ona tu’inanauga, ma sa na’o a’u o se teineitiiti ma sa ou fefe.’
Na ta’ua e le alii loia, Leauanae, e teena uma e Leiataua tuua’iga o faigaaiga faamalosi, sauaga matagā ma isi faiga faataugā faaleulugalii ma ia ta’ua ai, o nei tuua’iga uma o ni mea na fatu lava e le tamaitai na aafia.
Na vave ona tetee mai i ai le tamaitai ma ia tali mai a o maligi ifo ona loimata, ‘O mea na fai e lenei tagata ia te au, ua ou lagona ai sa pei a’u o se ta’ifau … e le’i iai ma so’u maliega i mea uma na ia faia ia te au.
‘E sau tuu mai faamalosi o ia ia te au, e tago una’i a’u i totonu o lo’u potu ma fai mai e talai uma ese o’u lavalava. Ou te le’i malie e faia ni feusua’iga ma ia.’
Sa fesiligia e Leauanae le tamaitai e tusa ai o se video o sana faatalanoaga ma leoleo na faia ia Tesema 2014, o lea na faato’ā toe matamata ai le tamaitai talu ai nei.
Fesili Leauanae, ‘O lenei ua tele atu taimi ua e faapea mai na fai ai e Leiataua ni uiga matagā ia te oe nai lo le mea na e ta’ua i le faatalanoaga lea, faamata e te lē ono faapea mai, sa sili atu ona lelei lou manatuaina o mea i le 2014 nai lo le taimi lenei?’
Na tali le teine, sa na o le 16 ona tausaga i lena taimi ma sa ia natia mea na tutupu ia te ia. E na te le’i manatua nisi mea na tutupu sa na o mea lava na tutupu tonu ia te ia.
Sa oo foi saunoaga a le alii loia o Leauanae i isi tuua’iga a lē na aafia e faapea na faamatamata o ia e Leiataua i ni ata faiga matagā. Saunoa Leauanae, ‘O loo faapea mai Leiataua, e na te le’i faamatamataina lava oe i ni ata o amioga matagā, e na te lei faatonua foi oe e te toe faatino mai ni amioga sa vaaia i ni ata o le TV ma e na te le’i tapu’eina lava ni ou ata pe pu’e foi ni ou ata i le video.’ O se manatu na matuā tetee mai i ai le tamaitai na aafia.
E lua vaiaso ua faatulaga e faagasolo ai taualumaga o lenei faamasinoga, ma o loo iai se vaega o faatonu e iloiloina le i’uga o lenei faamasinoga, ma o loo faafoeina e le afioga i le faamasino o Judge Richard Earwaker.
O le vaiaso fou lea o le a faafofoga ai le vaega o faatonu i le molimau a le tamaitai lona lua na aafia, o le aiga o tamaitai na faauluina le tagi, faapea ma se molimau a le alii o loo tuua’ia, o Tulisi Leiataua.
O moliaga o lenei alii e aofia ai, moliaga e 4 o le sexual violation by rape, 3 moliaga o le indecent act ma se tagata laitiiti, 1 le moliaga o le indecent assault, 10 moliaga o le sexual violation e ala i ni unlawful sexual connection, 7 moliaga o isi sexual violations, 2 moliaga o le isi assault i se tamaitiiti ma moliaga e 6 o se indecent act i se tamaitiiti.
