Na ta’utino lava e se tinā lona faaoolima i se mafine e faapea na ia takikiina le ulu o si ana tama e na o le 6 tausaga le matua, ma taumafai e una’i i lalo le tamaitiiti i le vaitā’ele ona o le solia e le tamaitiiti o ni tulafono o le vaitā’ele.
Na valaau ane le auaunaga a leoleo i lea faafitauli na tula’i mai i le Aso Gafua, i le vaitā’ele e pulea e le Hutt City Council, i le misa a ni mafine se to’alua, e māfua mai ina ua faaoolima le isi mafine i se tamaitiiti.
O se ata video na pu’eina o lea faafitauli na tula’i mai le Te Ngaengae Pool i Lower Hutt, ma tuu i luga o le social media e le tinā o le tamaitiiti na aafia.
O loo iloa atu ai le faapea mai o le isi mafine, na tule’i ma tu’i o ia e le tinā lea na pu’eina le video, ma ia ta’ua ai ua uma ona ia faatoese i le tinā e tusa o ana gaioiga na faia i le tamaitiiti.
O le mafine foi lea na viliina leoleo ona ua fai si malolosi o uiga ua faaalia e le tinā.
Ae i le video o loo tusi ai e le tinā le faamatalaga e faapea, e tusa o le 6pm i le afiafi ua tapuni le vaitā’ele ae ua toe mana’o lava si ana tama e toe puna tasi i lalo o le vaitā’ele.
Na faamatala ai foi e le tinā lona vaaia o le mafine lea ua tuu atu lona vae e toe tulei ai le tamaitiiti i lalo o le vai a o taumafai e alu a’e i luga, ma ia takiki faatolu ai loa le tamaitiiti.
Na ta’utino le tinā na ia faaoolima i le mafine lea ina ua fai ane ia te ia, e tatau ona e a’oa’i lelei lau tama.
Na tali ane le pulenuu o Hutt City, Ken Laban i faamatalaga na ta’ua i le video, ma ia ta’ua ai o loo silasila nei le pulega a Hutt City i lenei matāupu.
Na tāpā foi e leoleo le ata mai le CCTV mo le faaauauina o latou su’esu’ega i le matāupu ma le si’osi’omaga o mea um ana tutupu e pei ona lipotia atu.
Puna o Faamatalaga: https://www.stuff.co.nz/nz-news/360949253/mum-admits-assaulting-woman-who-allegedly-kicked-her-son-doing-one-last-manu
