Faate’ia Iapani ma le lalolagi atoa i le tagatavaleina o lē na avea ma Palemia o Iapani, Shinzo Abe 

O le faalavelave lenei i le Aso Faraile i Iapani na tagatavaleina ai Abe a o lauga i faiga faatosina a o loma ai le faigapalota i le Aso Sa. 

I ata na salalau mai i lipoti a le CBS na maua ai e faalua ona pa le fana na faaaogāina e lē ua ave e leoleo, Tetsuya Yamagami, 41 tausaga ma e faapea o se fana na ia faia lava e ia i lona fale. 

I lipoti e faapea ua leva ona taumulimuli lē ua molia i lenei mataupu ina ia faaoo le oti ia Abe, e mafua mai i ona talitonuga e iai se sootaga a lē sa avea ma Palemia ma se tasi o kulupu e lē fiafia iai. 

O le tuga tele o manu’aga na aafia ai le fatu o lē sa palemia na maliu ai lava i nai itula mulimuli ane. 

O se faalavelave ua fesiligia ai le saogalemu o sui momo’e aemaise ta’ita’i o Iapani ona e faapea e tupu lenei faalavelave e leai ma se leoleoga i le pito i tua. 

Ua momoli ai ma faamaisega a le Palemia o Niu Sila Jacinda Ardern ma i lana molimau i luga o le Facebook, o Abe o se tasi o ta’ita’i na ia mua’i feiloai iai ina ua tulai mai e avea ma Palemia o Niu Sila ma e lē galo lona finau malosi.