O loo sailia pea nei e leoleo se tagata e fetaua’ina na ia fanaina se isi alii ua maliu i le itu i Saute i Sasae o Melepone.
Valaau ane leoleo i se faalavelave na lipotia ane i se fale i Corrigan Rd i Noble Park i le taeao analeila ma ua ta’ua foi na maliu ai lava le tagata lea i le nofoaga na tupu ai le faalavelave.
Foliga na agai ane lē ua maliu i le fale lea ma vevesi ai ma se tasi sa i totonu o le fale ma i’u ai ina fanaina e pei ona ta’ua i lipoti a leoleo. Sola ese le tagata na fanaina ma na vaaia o agai atu i se paka e faaigoa o Ross Reserve.
Fai mai leoleo i le lipoti lea e foliga o le faalavelave lea e iai foi sona sootaga i ni kegi ma e lē taumate e masani i laua ua aafia i le faalavelave. Ua poloka nei e leoleo le auala lea o Corrigan a o sailia lē na fanaina lē ua maliu.
