Na faatumulia le malumalu o Elim Christian Centre i Porirua i le faai’uga o le vaiaso i aiga, uo ma ē masani a alo ma fanau mai ausiva tetele e tolu mai Ueligitone e molimauina tapenaga mo le Vaiaso o le Gagana Samoa 2022 faapea le patipatia o le 60 tausaga o le Tuto’atasi o Samoa.
O ausiva Samoa e tolu e aofia ai le Tofi o Tamatane na faavae mai i le tausaga e 2020 ma o loo taitaia e John Tavoi Kapeli, Nathan Lopa & Pati Feleti, o le ausiva lona lua ua faaigoaina o le Anamua Fou na faavae i le tausaga e 2016, taitaia e Masi Smith, Justine Taito – Matamua & Lily Sio ma le ausiva a le Tautua na amatalia foi i le tausaga e 2016, taitaia e Jayden Luapo & Sophia Uele.
O ia ausiva o loo agai le latou faamuamua i le faatumauina o tu ma aganuu a Samoa aemaise o se auala e mafai ai e alo ma fanau Samoa o loo ola a’e i Niu Sila ona a’oa’oina ai le gagana faapea tiute o le tama poo le teine Samoa.
O lea polokalame na faaigoaina o le “Lalelei o le Laumua o Ueligitone” na mātauina ai le molimoli mai o le fe’au i le tāua lea o le gagana Samoa, o le tāua o le toe foi e a’oa’oina tupuaga ma vaega tonu e tupuga mai ai.
Na faaalia e le Komiti o lea polokalame o se taimi muamua lea ua faia ai lea faamoemoe tuufaatasi ma o le amataga lea o faatasiga faaletausaga ina ia faatumauina ai le iloa e sui auai o o latou faasinomaga ma le tāua o le Aganuu a Samoa.
