Ua mae’a nei le sailiga o se Tausala Samoa Niu Sila ma ua faapaleina ai le tamaitai o Shilohm Vaeluaga Filipi.
O Shilohm e 22 tausaga le matua ma e mai afioaga o Siumu, Matautu Lefaga, Saanapu, Saleaumua ma Vaovai Falealili. O loo galue nei i le Aoga Amata a Taeaofou i Puaseisei ma o loo saili lana tikeri i mataupu tau fesoota’iga (Bachelor of Communication Studies).
E pei ona ta’ua i le saunoaga a le Faatonu o le Miss Samoa New Zealand, Ulalemamae Teeva Matāfai, e to’aono tamaitai na faaulu o latou suafa e fia tauva, ma o lena tauvaga sa mua’i faatino i luga o fesoota’iga faainitaneti, e fua i vaega eseese sa faatulaga e tauva i ai tamaitai ta’ito’atasi.
Mai lena to’aono, e to’atolu tamaitai na filifili le laulau o faamasino o le a faia i ai le faai’uga faai’u poo finalists, e pei ona faatulaga i ai le afiafi anapo, Aso Lulu, 27 Iulai 2022. Peitai na toe faamaamulu le tamaitai e to’atasi mai lea to’atolu, ma totoe mai loa na o le to’alua tamaitai poo finalisits na saili mai ai se Tausala Samoa Niu Sila.
O le i’uga o le tauvaga na tulaga lua ai le tamaitai o Georavi Pepe Gwendalin Malelega Apulu ma na ia maua foi faailoga o le Miss Photogenic ma le Best Puletasi.
O Shilohm na manumalo i le tele o faailoga, e pei o le Taliga Fesili, Taleni, Faafeiloa’iga (Best Introduction), Siva Samoa, ma le Miss Personality.
Na faatumulia le Maota o Samoa i Magele i aiga, uo ma ē masani a tamaitai tauva, ma o le tamaitai o Shilohm lea o le a malaga atu i Samoa i le tauvaga tele mo le sailiga o le Tausala o Samoa 2022 i le masina o Setema.
