Ua faamaonia mai e le Sui Komesina o le Matagaluega o Leoleo susuga Auapaau Logoitino Filipo le maliliu ai o ni tagata se to’atolu o le aufaigaluega vaega o le Aseta a le Matagaluega mai le faalavelave na tulai mai i Siumu i le aoauli nei.
O le faamaninoga mai a le Sui Komesina o i latou ua maliliu ma manunu’a e le’o ni leoleo ae o sui o le aufaigaluega a le Matagaluega i le vaega o Aseta.
Taua e le Sui o le Radio Samoa ia Maina Vai i le la talanoaga ma le Sui Komesina o le loli a le Matagaluega lea na lavea sa malaga atu mo Poutasi auina atu ai nisi o meafaigaluega peitai i le ifoifo atu i Siumu na tulai mai ai loa le faalavelave ma lē mafai ai e le avetaavale ona taofiofi le loli ma lavevea ai.
Faailoa foi i ripoti e leai se isi lava taavale na aafia i le faalavelave ua na’o le loli a le Matagaluega lea na malaga atu e faamoemoe mo Poutasi Falealili.
