Fai mai e to’alua ni talavou na sesē le ato na o la tuuina i le nofoaga e tuu iai foa’i a tagata i fafo ane o se charity shop i Niu Sila, ae o totonu o lea ato o loo iai mariuana ma se tupe ma ua lipotia e le CNN na vave ona toe aga’i ane talavou ia e toe ave le ato.
Fai mai le faamatalaga a le tagata faigaluega i lea faleoloa o totonu o le ato na maua iai tagapepa mariuana pe ā ma le 43 kalama atoa ai ma le tinoitupe e $3,700 tālā Niu Sila, e pei ona faamaonia mai e leoleo.
Fai mai o le aso 18 o Fepuari na tupu ai le matāupu lea i Southland ma e lē o faailoaina le nofoaga tonu o le faleoloa ona o puipuiga ae o nisi faamatalaga e faatatau i talavou o loo aofia i le matāupu e faapea o se alii ma se tama’ita’i ma sa tuu ai le ato i fafo o le faleoloa a o faatali mo le la taavale sa service i le pisinisi i autafa o le faleoloa lea.
Na valaau leoleo ina ua toe foi ane i la’ua ia e sa’ili le ato ma o loo faailoa foi i le lipoti na maua ai ma se fana.
E lē o ta’ua i le lipoti pe ua faia ni moliaga i le matāupu lea ae e iai tulafono ogaoga a Niu Sila e faatatau i lipoti e mafai ona faamatuu mai aemaise lava i matāupu tau le faamasinoga o talavou, i latou e le’i atoa le 17 tausaga le matutua.
Puna o Faamatalaga: https://edition.cnn.com/2026/03/09/asia/weed-cash-new-zealand-charity-shop-intl-scli
