O le auai o le usugafono a Samoa i Peletania mo nisi o fonotaga faavaomalo e pei ona ta’ita’ia lea usugafono e se tasi o Suei Palemia le afioga i le tama’ita’i Minisita o Tupe, na maua ai le avanoa o le Sui Palemia ma lana usugafono e auai i le sauniga lotu o le aso faamanatu o malo uma o le Taupulega.
O se sauniga e pei ona faailoa i se pepa o faamatalaga mai le ofisa sooupu o le malo o loo avea ai le minisita ma sui o le Palemia o Samoa o loo umia le tofiga ta’ita’ifono o Malo o le Taupulega.
O le tama’ita’i Sui Palemia sa aofia ia i latou sa iai o latou tofiga i le sauniga lotu a Malo o le Taupulega lea sa ia faitauina le Tusi Paia a o faatumulia lea sauniga sa faia i le malumalu o le Westminister Abbey i le aai o Lonetona.
O se avanoa na feiloa’i ai foi le Sui Palemia ma le Minisita o Tupe o Samoa ma le Tupu o Salesa o le Faaao o Malo o le Taupulega.
O lea sauniga faaletausaga o se avanoa e faatasia ai atunuu e 56 o Malo o le Taupulega e faamanatu ai matāupu faavae ua autasi iai, o le lotogatasi, o le felagolagoma’i, ma le faatāua o le eseesega o aganuu.
Sa auai ai foi le susuga Sam Asotasi, o se tamafanau a Samoa mai Letogo ma Safotu o loo tautua i le kalapu lakapi a Cambridge, ma o ia sa tauaveina le tagāvai o le Malo o Samoa i lea sauniga.
O se mitamitaga foi lea i le faalauiloaina o Samoa ma ona tagatānuu i le lalolagi faapea polokalame faamanatu a Malo o le Taupulega.
