Ua toe taofia lava le Palemia o Ausetalia mai le ioeina o le toe faaauau o le faigaluega mai le fale poo le work from home ae ua ia ta’ua o le a tuu ia i le faitalia a pisinisi i le faiga e aupito sili ona talafeagai mo latou.
Fai mai le Palemia e mana’omia ona tuu le faitalia i pisinisi latou te faia ai le faai’uga e fua i luga o le saogalemu o tagata faigaluega ma o nisi foi tagata e ono lē mafai ona faigaluega mai i le fale.
O le faia foi o se faai’uga e faigaluega mai le fale o le a lē aogā lea mo pisinisi e pei o faleoloa ma fale’aiga ma e lelei ai ona tuu i le faitalia a le pisinisi ia e fai le latou faai’uga e talafeagai ma latou.
Ua afua ona toe valaauina e nisi le faatino o tulaga ia e pei o le faia o talifofoga ma le faigaluega mai le fale ona o le siitia pea o le aofa’i o tagata aafia i le faama’i ma le fūlū ma ua toeitiiti lava toe oo i le taimi na tetele ai le faama’i ma faatino ai vavao i le atunuu.
