Ua faatoese uma le to’a 8 ua molia i le fa’alēmigao i le faamasinoga a le atunuu e ala i upu ma tala na lafo i nisi o alii ma tamaitai o le faamasinoga e aofia ai le afioga i le Faamasino Sili ae ua faailoa e latou loia e lē tatau ona faia iai se faasalaga.
O ia faatoesega na folasia e loia mo lē sa avea ma Palemia le susuga Tuilaepa Lupesoliai Sailele Malielegaoi faapea loia mo sui faipule e toalua a le vaega faaupufai e Puipuia Aiā Tatau o Tagata e aofia ai le sui taitai ma le failautusi o lea patī faaupufai.
O faatoesega foi na faailoa e loia o loo tulai mo isi e aofia ai le tamaitai loia le afioga Maiava Visekota Peteru, ma le alii faasalalau a le TV1 le susuga Sioeli Alofaifo.
O le tulaga lava lea e tasi mo isi o loo molia, o lē sa avea ma failautusi o le Fono Aoao Faitulafono, o lē sa avea ma Loia Sili a le Mālō o loo molia i le faalemigao i le faamasinoga ona o le lā lē usitaia o le poloaiga e logo ai o latou taitai falemalo ina ia taofia le Palemene i le Aso 24 o Me 2021 e faatautō ai sui na filifilia mai i le palota tele i le Aso 9 o Aperila 2021.
Ua taoto atu nei ia faatoesega i alii faamasino mai Niu Sila ma Ausetalia ua tagofia lea mataupu mo se la faaiuga o le a fofogaiga i se taimi e lei faamautu mai ina ua maea suesueina lea mataupu i le Aso Gafua o lenei vaiaso.
Na auai le susuga Tuilaepa e ala i fesootaiga o le video link mai Niu Sila faapea foi loia mai fafo o loo aafia le mataupu faapea le tamaitai Loia ia Taulapapa Brenda Heather Latu mo le itu tagi a le Faatuatua i le Atua Samoa ua Tasi.
E iai le talitonuga o le faaiuga o le a aumai o le a iloa ai pe talia faatoesega ua faia ae o le a se aiaiga e faatino ai ia faatoesega i se tulaga aloaia mo le faasalalauina faalauaitele i le atunuu. O le a iloa ai foi i se faaiuga e taunuu iai le mataupu pe o le a talia le folasaga a loia mo i latou ua molia e le tatau ona faia se faasalaga poo se togisala.
O le faia e se tasi o upu faifai, ma faalumaluma ma tau faaleaga i le faamasinoga o se solitulafono ogaoga ma mamafatū e ono faasala ai se tasi i le falepuipui poo se isi faasalaga o loo aiaia faaletulafono.
