O le toe fetuuna’iga a le Labour ua tuu ese ai le faipule o Willow-Jean Prime mai le matāgaluega o a’oga sa avea ai ma sooupu, ae ua tuu atu iai Ginny Andersen.
O isi suiga na faalauiloa i le asō mo le faafaletui a le Labour ua faatulaga ai se vaega fou e gafa ma matāupu tau i le va i fafo (Foreign Affairs) ma le puipuiga (Defence).
O portfolios na sa tauave e le faipule ua faamavae o Peeni Henare.
O Vanushi Walters lea o le a sooupu mo le Foreign Affairs (e iai faatasi ma le NZSIS ma le GCSB), ae o Damien O’Connor ua sooupu mo le Defence.
O loo tumau pea le tofiga mo le Trade portfolio ia O’Connor faatasi ma isi.
O Reuben Davidson lea ua tuu atu iai le Economic Development lea sa ia Henare.
O le tama’ita’i o Camilla Belich ua tofia nei e avea ma sooupu o le vaega i le matāgaluega o Faamasinoga, lea sa tauave e Duncan Webb, lea ua faamavae mai le polokiki.
Ua lē o toe tauaveina e Willie Jackson le Social Development, ae ua gafa nei ma matāupu tau Māori Crown Relations.
O Willow-Jean Prime lea sa avea ma sooupu mo le matāgaluega o a’oga, o lea ua avea nei ma sooupu mo le matāgaluega a le Social Development.
O nei suiga ua faia ina ua faamavae nisi o faipule mai le vaega faaupufai a le Labour, e aofia ai ma le to’alua lea ua foufou mai le la faamavae ese, le sooupu o loo iai nei mo le Faamasinoga, Duncan Webb, ma le sooupu o loo iai nei mo le Foreign Affairs, Peeni Henare.
O se mea masani lava a vaega faaupufai le toe faia o ni a latou fetuuna’iga i le tausaga o le faigāpalota, ma ua faatalitalia, o se taimi lata mai, o le a faasilasila mai ai e le afioga i le Palemia, se toe fetuuna’iga i lana Kapeneta, ona o lea foi ua agiga le faamavaega a nisi o minisita e pei o Judith Collins ma Shane Reti.
Puna o Faamatalaga: https://www.nzherald.co.nz/nz/politics/election-2026-labour-party-announces-caucus-reshuffle/VH25T6XHZ5HCDDN7DZPFFR7IQI/
