Ua faaseā lē sa avea ma sui Premier o Niu Sa Uelese, o John Barilaro i se mataupu na aafia ai a o agai atu ma ana uo mo se tafaoga i Sini.

I ni nai vaiaso ua tuanai atu e oo mai lava i le asō o loo gugulu lava le setete i le mataupu e faatatau i le avanoa sa feta’uaina ai Barilaro mo Amerika, o le galuega tau komesina o fefaataua’iga i Niu Ioka lea fai mai e oo atu i le 500 afe le totogi i le tausaga.

E ui ua faamaamulu ese mai Barilaro mai le avanoa lea peitai o loo faagasolo lava le su’esu’ega a le komiti a le Palemene e sailia le sa’o o le mataupu lea foi sa feta’uaina le aafia ai o le Premier o loo iai nei o Dominic Perrottet.

Fai mai le faaseā a Barilaro ua taula’i lava faasalalauga ma su’esu’ega a le aufaasalalau ia te ia ma ua aofia ai foi la ma finauga ia ma se alii pu’eata i le po o le Aso Toonai na te’a nei a o agai atu mo se tafaoga ma ana uo.

Ua faamaonia mai e leoleo o loo latou su’esu’eina le mataupu ae fai mai Barilaro e iai foi lana aiātatau e puipui ai lona tagata pe afai ae faafuase’ia ona osofai faapea o le tuu faafuase’i ane o le meapu’eata i ona foliga ma le mic e aunoa ma se talanoa lelei ane poo le ā se mea o mana’omia mai ia te ia.