I Ausetalia nei e pei lava foi o Niu Sila ma isi vaega o le lalolagi o loo laualuga lava foi i talanoaga ma faasoa o lenei aso le tuumalo o le Tupu Tamaitai o Elisapeta.

Faateia foi le toatele i le tala ona e lei leva atu nei ona vaaia ata o le Tupu Tamaitai i luga o le televise ina ua faafeiloai aloaia le palemia fou o Peretania o Liz Truss.

Fai mai molimau a nisi o le a misia e le toatele lea taitai ona o le umi o le taimi o lana nofoaiga ma pau foi lea o le taitai o Peretania sa iloa e tagata o lenei tupulaga talu ona soifua mai i le lalolagi. 

E tele taimi na asia mai ai e Elisapeta le atunuu nei aemaise foi isi o lona aiga. Sa faaoo foi e le kovana o Ausetalia faamaisega i le Aigatupu faapea foi le Palemia ma le faamatalaga o le a malaga i Peretania i ni nai aso o lumanai ai e faaoo moomooga alofa ma faamaisega a le atunuu i le Aigatupu ma le malo tele o Peretania.