Ua faamāmā e le malo le tulafono o loo faamalosia ai tui o le Koviti mo tagata galulue i le soifua maloloina, ma e iai nisi o le a lē toe oo iai le malosiaga o lea tulafono. 

O le vaiaso nei ua faatapulaa ai e le malo le aufaigaluega e faamalosia tui ma e na o le pau tagata galulue o le a faamalosia pea o i latou e maualuga le lamatiaga e pesia i le vairusi. 

Mai le pulega fou a le soifua maloloina Health NZ o soo se tagata faigaluega e le faafesagai ma tagata lautele pe fesootai foi ma gasegase, o i latou nei e le toe faamalosia le tau faia o tui o le Koviti. 

Ae i se toe tepa i le to’atele o le aufaigaluega a DHB latalata i le 1,500 i latou na stood down ona o le tui, o nisi na faamavae a o isi na faalēaogāina ai a latou konekarate, ma o lea fuainumera e aofia ai le 811 e le o ni foma’i poo ni tausi soifua foi. 

O lenei suiga e aloaia mai le po a taeao.