E faitau afe tagata faigaluega tausi soifua, healthcare workers i Niu Sa Uelese o le a maua se peimeni e tasi, o se faafetai mo le latou galuega i le taimi o le faama’i, o le peimeni e $3,000 a le tagata e pei ona folafola e le faigamalo a le setete. 

O le falemai i Liverpool sa faia ai le faaaliga lea e le premier o le setete Dominic Perrottet ma ia ta’ua ai o le a faia lea peimeni mo healthcare workers uma ma le latou sao i le lua tausaga talu ai. 

Na ia ta’ua foi o le peimeni e faatāua ai foi le tāua o le latou galuega aemaise o le pepesi foi o le flu i lenei vaitau ua atili faigata ai le latou auaunaga. Na saunoa foi le minisita mo sootaga tau galuega Damien Tudehope o lea peimeni e faatāua ai foi se aufaigaluega ua faia se laasaga agai i luma ma e aofia ai i latou o loo galulue o ni paramedics, midwives, le au galulue kiligi ma isi tagata faigaluega a le NSW Health Service. 

Na faailoa foi e le premier e silia ma le 10 afe le aufaigaluega e aofia ai foma’i ma tausi soifua o le a faafaigaluegaina i totonu o le fā tausaga i lalo o se taumafaiga o le a faaalu ai le 4.5 piliona.