Ua taoto atu nei i le Komiti o le Tamaoaiga o le Fono Aoao Faitulafono le tulafono taufaaofi a le Matagaluega o Tiute ma Tupe Maua o loo autu i le soloia lea o lafoga totogi a faifeau tausi nuu o Ekalesia eseese i Samoa.
O le tauaofiaga o le Palemene i le Aso Lua o lenei vaiaso ma faatoa soalaupule ai lenei tulafono taufaaofi ma lagona ai le lagolago a le ituagai na momoli faatasi ma tuualalo ma fautuaga i le Mālō e pei o le fautuaga o le sui faipule o Siumu ia ave i le atunuu e aumai so latou finagalo e ala i se palota faalauaitele poo se pelepesite.
Ae na tali le Minisita o Faatoaga ma Faigafaiva o ia leisi sa finau i le paeaiga ua mavae a le Palemene ina ia taofi le faia o lafoga a faifeau tausi nuu ae sa leai se silasila a le faigamalo ua mavae o fesiligia se finagalo o le atunuu.
Taua e le sui faipule Ia Tuuu Anasii Leota “ O so’u a manatu vaivai le afioga, a mea tatou te le ō ai i le atunuu fai se referendum, poo se tatou pelepesite fesili pea i le atunuu, oute talitonu a o lae e lagona e le atunuu le mea e tatau ona fai, a aumai a le finagalo o le atunuu aveese le lafoga ia ave ese le lafoga”.
Ae tali Laauli “Ona o lea ua faalua le saunoaga lea e faapea o le campaign lea sa faaaoga e le matou vaega faaupufai lenei, lau afioga e le’o se campaign o le mea sa’o lava na matou lagona e tatau ona faasa’o i le atunuu, o le mea lena lea na auvatu ae le’o se mea na faafuaveta na nofonofo a feala mai le taeao fai, leaga o le mafatiaga lea na matou iloa na o’u iai foi ma a’u i le taimi na taumafai atu lava toe tilotilo ma toe vaavaai, lea la ua saunoa le sui mamalu e tatou o i le atunuu, na tatou o i le atunuu i le taimi na fai ai le mea lea? Na tu sasa’e a’e a i luga fai leai ma se fesili i faafeagaiga, fai faamalosi”.
Na faaalia e le Minisita o Tiute ma Tupe Maua le afioga i le Sui Palemia Tuala Tevaga Ponifasio o lana Matagaluega e ana le tulafono taufaaofi o le finagalo o le Mālō e toe faasolomuli o lafoga o faifeau e tausia aulotu i nuu ma afioaga ona e le’i finagalo iai tuaā ma matua ma amataina Pulega a Mālō a Samoa talu mai le tausaga e 1962 na tutoatasi ai ona o le tausia lea o le vā nonofo ai ma le Atua o loo faavae ai le atunuu.
Taua e Tuala “O Samoa e ese mai lava mai atunuu uma o le lalolagi, o lona faavae o le Atua sei tatou fesili ane a pe aiseā na lē totogi lafoga ai faifeau ina ua tutoatasi Samoa ma faavae mai Samoa i le Atua. Ae silafia foi i lena vaitaimi ma silafia e tatou tuaā le tulafono i le lalolagi atoa e oo ia Iesu na togi lafoga foi. O lea sa silafia e tatou tuaā peitai faimai i latou e lē totogi lafoga faifeau. Aisea? Ia o le tali ae le’o le pine ea lena o tatou mau faaaloalo amanaia lo tatou faamemelo ma faaetete ma le alolofa i auauna a le Atua o loo faamoemoe iai le atunuu i a latou tatalo aua se manuia o Samoa”.
Ua faaalia foi e le Minisita o Tiute ma Tupe Maua o le tuuina atu o le tulafono taufaaofi i le Komiti faapalemene mo le Tamaoaiga e toe lau liliu ai le tulafono ma avanoa ai ona toe silasila le Komiti i faituaga ua tuuina atu.
O se tasi o fautuaga mai le itu agai e tuu saunoa lafoga totogi a faifeau tausi nuu ma ia aofia ai ma faifeau ua faauu, i latou o loo galulue i auaunaga eseese a Ekalesia Kerisiano o le atunuu. Mo le silafia o faafeagaiga o loo galulue mo latou lava Ekalesia i tomai eseese o loo faia a latou lafoga e toese mai i o latou totogi.
Ua tolopo nei le Palemene e toe usuia i le Aso 29 o le masina fou o Mati.
