Ua toe maua ni faamaumauga na teu i ni masini komepiuta a le Matagaluega o Galuega Telele a le Mālō lea na leiloloa i le amataga o le masina o Aukuso i se vairusi o fesootaiga o masini komepiuta ua faamatalaina i le gagana peretania o le ransomware virus.
Ua faaalia e le Ofisa Sili o Pulega a lea Matagaluega a le Mālō e 8 masini komepiuta na aafia ai ma o le 4 o ia masini o meatotino a le vaega o felauaiga.
O le toe maua uma o faamaumauga na leiloloa o loo faaauau iai le suesuega e saili poo fea na mafua mai ai le faaletonu.
Faaalia e le Ofisa Sili le afioga ia Magele Hoe Viali i se pepa o faamatalaga o le gaioiga na faatino e i latou ua iai le tomai i fesootaiga faatekonolosi faaonaponei na mafai ona taofia ai le aafia o isi faamaumauga o loo teu malu i totonu o nisi o masini komepiuta a le Matagaluega.
Ua faamanino mai foi e Magele e le’i titinaina pe tapē faamaumauga e pei ona lipotia e nisi o auala o faasalalauga. Ua tautino foi le Ofisa Sili o se sasi i le va o ia ma tagata ofisa e vaaia fesootaiga faatekonolosi i le Pulega o Malae Vaalele na mafua ai ona ia manatu ua aafia foi ma faamaumauga a lea auaunaga taua e nafa ma le puleaina o malae vaalele o le atunuu.
Ua teena e le Ofisa Sili ni manatu masalosalo e iai se fesootaiga faapolokiki o tulaga na aliali mai ma le faatoa amata ai o tiute o le Minisita fou o le Matagaluega o Galuega Tetele a le Mālō le tōfā Olo Fiti Vaai. O le faaletonu e pei ona ia faailoa na tupu i le masina o Iuni a’o le’i oo i le taimi na nofoia e le Minisita fou lona ofisa mo le faatinoina o ona tiute faalemalo.
