O le alii o Chang Jonathan Taumata Rodney ma le tama’ita’i o Aumua Geraldine Karita o ni tamafanau a Samoa o le a faaauau i iunivesite i le atunuu o Iapani, a la a’oa’oga e ala i avanoa sikolasipi a le malo o Iapani ua faaigoaina o le MEXT scholarship.
O le alii o Chang Jonathan o le a su’eina lona faailoga faafoma’i i matāupu tau si’osi’omaga ma le faasaienisi, ma o le iunivesite i le aai o Tokyo o le a a’oga ai.
O le tama’ita’i o Aumua Geraldine o le a autū ana su’esu’ega i matāupu tau i suiga o le tau ma tulafono e faasino tonu iai i le faamoemoe a toe taliu mai i le atunuu o le a mafai ona galue i polokalame mo tagata lautele i tulafono e faasino i suiga o le tau.
O le a a’oa’oina o ia i le iunivesite i totonu o le aai o Yokohama.
Ua faailoa e le ofisa o le malo o Iapani i Apia o le faanaunauta’iga ia foi mai ia alo o le atunuu o le a faaaogā o la tomai e galulue ai mo le lelei o tagata lautele, ma pine faamau ai sootaga vavalalata o atunuu o Iapani ma Samoa.
