E tulaga ese foi se tasi o mataupu ua lipotia mai i Isaraelu i le asō ma ua faaaofia atu i le tatou lipoti i lenei aoauli.
O se ulugalii mai Isaraelu na agai atu i le malaevaalele e siaki la avanoa mo le malaga agai i Belgium i le Aso Lua o le vaiaso nei ma le la tama pepe.
Fai mai e lei iai se ticket a le pepe ae o le itu e maofa ai le toatele, ona sa faaauau pea ona agai le ulugalii i le vaalele ae tia’i ai le pepe i luga o le check in counter a le kamupani vaalele.
Na faailoa i leoleo lea mataupu ma na ta’ua na toe aveese mai ai lava le ulugalii mai le vaalele ma faia loa iai suesuega a leoleo.
O le upega tafailagi a le kamupani vaalele na fai ai le booking a le ulugalii lea o loo ta’ua ai e mafai ona aofia ai ma le pepe i le faiga o le booking ma e na o le 38 tala tupe a le atunuu lea le totogi.
O le ulugalii o loo aafia e iai tusifolau Belgium ma o se lipoti lata mai o le mataupu ua ta’ua ai ua toe faatasia nei le ulugalii ma le pepe ma ua leai se isi suesuega o toe faia.
E ui i lea ae fai mai se tasi tamā matua na faitau ai i le lipoti, o ia e makuai pasi ma le ofo i ia ituaiga tagata, e tamomo’e e tuli le vaalele ae tia’i le pepe i luga o le counter.
