Tusia: Maina Vai
O loo faaauauina pea ona te’ena e le sa avea ma Ofisa Lagolago o Pulega o le Ofisa o le Komisi o Faigapalota ia Afualo Faumui Daryl Mapu moliaga e 6 o loo faasaga atu ia te ia.
O moliaga e aofia ai le umiaina o fualaau faasaina, umiaina o mea faigaluega e faaoga e ula ai le aisa, umiaina o laaumalosi e lei laiseneina, faapea ma le umiaina o ututau e le faatagaina, umia o ututau e aunoa ma se pemita e faataga ai ona faaogaina faapea ai lona umiaina o se auupega e le fa’atagaina i Samoa.
Na tulai lana loia le tamaitai o Magele Leone Mailo Su’a ma faailoa le teena ai pea e lea alii o moliaga faasaga ia te ia. O loo tatala i tua Afualo i tuutuuga ua maea tu’uina atu iai e le faamasinoga. O tolaulauga a le Faamasinoga i le asō ua tuuina atu ai le mataupu lenei e iloilo mau i le vaiaso e amata atu i le aso 27 o le masina o Iuni o le tausaga nei, faatasi ai ma le tamaitai ia Marie Fanueli lea o loo molia faatasi laua i le mataupu lenei.
O le osofaiga a leoleo na maua ai i laua nei ae na taua e le Komesina Lagolago ia Leiataualētauā Logoimauga Samuelu Afamasaga ua leva ona tulimataia Afualo ona sa iai faamatalaga sa tuuina atu muamua i isi galuega a leoleo na maua ai. E ui i lea tulaga ae sa vaavaai lava leoleo ini faamaoniga.
