Ua faamalieina le Pule Faatonu o loo pulea ma mata’itu auaunaga tau fesoota’iga tekonolosi uma i Samoa i le usitaia ma le tausisia e le kamupani o fesoota’iga tekonolosi o le BlueWave o aiaiga o le Tulafono o Fesoota’iga i le tuuina atu o ana faamatalaga tau tupe.

O lea kamupani ua ave iai e le Malo le galuega o le faapipiiina o fesoota’iga tau satelite e maua ai e fanau le initaneti e faia ai a latou a’oa’oga. I se pepa o faamatalaga faalauaitele mai le tamaitai Pule Faatonu le afioga Lematua Gisa Fuatai Purcell o loo ia faaalia le taulimaina e lona ofisa o faamatalaga tau tupe uma a lea kamupani mo le tausaga 2020 i le 2021 na faai’uina i le aso 30 o Iuni o le tausaga na te’a nei.

O le finagalo o le Pule Faatonu ua afua mai i ni lipoti ua salalau ma manatu faaalia o nisi tagata ua latou fesiligia ai tulaga agavaa o lea kamupani ma lo latou mulimulita’ia o tulafono o fesoota’iga e aofia uma ai auaunaga tau fesoota’iga e oo lava i fale televise.

Faaalia e Lematua Gisa Fuatai Purcell, o lona tiute o ia o le Pule Faatonu e ao ona ia faamautinoa mo le silafia e le atunuu le usitaia ma le mulimulita’i o pisinisi ma kamupani o loo faia fesoota’iga o aiaiga o le tulafono. Ua faailoa foi e le Pule Faatonu o le tuuina atu i le kamupani o le BlueWave o le galuega o satelite mo le maua o fesoota’iga televavave e a’oa’oina ai fanau, e lē o faatamala lona ofisa e ala i le aufaigaluega i le mata’itu lelei o lea galuega, e pei ona iai ni popolega ma atugaluga o nisi.

O le feiloa’iga a tusitala i le vaiaso nei ma le Pule Faatonu faapea le Minisita o A’oga Taaloga ma Aganuu na faamanino ma faamalamalama ai ia vaega uma ma tali atu ai foi i ia popolega.