Ua fautuaina mātua ma aiga i Ausetalia ina ia ave o latou alo e fai tuipuipui o le flu a o sau mālie le taumalulu i le atunuu.

O faamaumauga fou ua faailoa mai se suesuega ua iloa ai e na o le toatasi mai le toa 10 o ni tamaiti, ua faia le tuipuipui.

Na saunoa le fomai i le Royal Children’s Hospital, Dr Anthea Rhodes e silia ma le 40 afe cases ua mae’a faamauina i le tausaga lenei ma e taatele lava le au mama’i i tamaiti pepe e oo i le 14 tausaga le matutua.

Fai mai fomai o lea ua taunuu tonu i le vaitau o le flu ma o tamaiti e mātele ina ogaoga iai aafiaga o le flu ma e tāua tele i mātua ona faia vave loa tuipuipui o le fanau.

O loo ta’ua mai i nisi o cases o le a ogaoga aafiaga i le fatafata ma māmā ma iu ina aafia ai i le pneumonia.

Ua faailoa e fomai e ao i tagata ona silafia o le flu e ogaoga aemaise lava i tamaiti laiti. 

Ua sauno foi Rhodes e iai nisi faamatalaga sese o loo feaveai i luga o upega tafailagi lea e talitonu ai nisi mātua e mafai ona e maua mai le flu mai le tuipuipui o le flu.

Ua faamautinoa mai e le fomai e leai se tulaga e mafai ai ona tupu lea tulaga.

Pe ā ma le 70 pasene o mātua latou te lei iloa pe manaomia tuipuipui fou mo le flu i tausaga taitasi.

Ua faailoa e fomai e tusa pe sa fai le tuipuipui o le tamaititi i le flu i le tausaga na tea nei e le puipuia ai o ia mai le aafia i le flu i le tausaga nei, e ao lava ona toe faatino le isi tuipuipui mo le tausaga nei.