Tusia: Maina Vai
Ua tatala i tua le talavou 17 tausaga mai le afioaga o Siumu lea na mafua ai le mū o se pamu penisini i le vaiaso talu ai i Safata.
O aiaiga o le tatala ai i tua e aofia ai le faasā ona toe vaaia latalata i se pamu penisini, ae ia nofo pea i Siumu. Ua faasā ona toe fesootai atu i molimau a le itu a leoleo, aua nei toe molia atu i se isi solitulafono ma ia saini i le ofisa o leoleo i Poutasi e le silia le 4 i le afiafi o Aso Faraile o vaiaso taitasi.
O loo molia Penerose Peneueta i le moliaga o le susunuina o le pamu penisini. Ua tuuina atu e le Faamasinoga le vaiaso fou e toe tulai ai lea alii ma sana tali i le moliaga ua molia ai nei. O le faalavelave lenei e leai se tasi ma maumau ai le soifua pe faamanualia ai foi, ae o faamaoniga mai leoleo e faapea o le oo atu o le ua molia ma isi i le pamu e utu se penisini e alu ai le faiva, na mafua ai le mu ina ua faamumu e le ua molia le afi a’o utu le fagupau ma apo mai ai loa e le penisini ma sasao ai loa le mū lea ua faaleagaina ai se tasi o masini pamu a le pamu penisini lea i Safata.
Ua faailoa fo’i ua maea faatino le ifoga mai le aiga o lea alii talavou i le Alii faipule e ona le.pamu ia Leaanā Ronnie Posini.
