O le faaiuga o le masina nei i lona Aso Toonai mulimuli, o le aso mulimuli lea o faatauga i se tasi o maketi pisi i Sini ina ua faailoa mai i le vaiaso nei le latou faaiuga o le a faamuta ai lea auaunaga i le silia ma le 30 tausaga na tautua ai le au faatau i Sini.
Ua faafetaia e maketi i Glebe le lagolago a le aufaatau ia latou maketi mo le 31 tausaga.
Na muai amata i le 1992 ma e faia lava i le lotoā o le Glebe Public School ma ua masani ai le komiuniti i Sini.
E le o ta’ua i se pepa o faamatalaga mai le pulega o le maketi pe aisea o le a tapunia ai ae o loo iai lipoti ua ta’ua ai se faamatalaga a le matagaluega o aoga a Niu Sa Uelese e faapea o loo galulue nei i le sailia o se tali o le mataupu.
Ua ta’ua i lipoti a le 7News o loo faia nei se fuafuaga e sailia ai se isi vaega fou latou te faatautaiaina le maketi ona o le a lē mafai ona faaauau e i latou sa faafoeina muamua.
I luga o upega tafailagi ua faaleo ai faanoanoaga o le toatele aemaise lava mai le komiuniti lea ona o lenei faaiuga.
Fai mai nisi o se tala aupito faanoanoa lea ua o latou mauaina talu ona amata mai lenei tausaga.
