Ua amata ona tapenapena le malo i le tasi o faamanuiaga tau tupe ua faaigoaina o le Baby Bonus e faapitoa i pepe fou faato’ā fananau mai, ma fanauiti ua atoa le tasi le tausaga o le latou matutua.
O se tasi o faamanuiaga na folafola e le vaega faaupufai o le Faatuatua i le Atua Samoa ua Tasi i ana faalauiloa o faatosina o le palota tele ia Aokuso o le tausaga ua mavae.
E 100 tālā o le a maua e le pepe i le masina ma fanauiti ua atoa le tausaga o le matutua, ma o le a faaauau ona maua lea faamanuiaga se’ia oo ina aulia le 3 tausaga o le matua ma ua sauni e ulufale i A’oga Amata poo A’oga Faata’ita’i.
Ua faailoa e le Minisita o le Matāgaluega o Tinā ma Tama’ita’i, Atina’e o Afio’aga ma Aga Fesoota’i lea o loo iai le vaaia o le poloketi miliona mo le atina’e o itumalo, o le masina o Iulai o le tausaga nei pe a amata le tausaga faaletupe fou, o le a amata maua ai lea faamanuiaga tau tupe mo pepe ma fanauiti.
O se finagalo o le Minisita o le Matāgaluega o Tinā ma Tama’ita’i, Atina’e o Afio’aga ma Aga Fesoota’i, le afioga Moefaauouo Julius Ah Kui Tafuna’i.
