Na taofia nisi o malaga i totonu o Amerika Samoa ina ua faamaonia suega poo test a se tasi o pailate a le vaalele Twin Otter Samoa Airways ua aafia i le koviti. 

I ripoti a le Talanei News e taua ai o se malaga na fuafua mo Manu’a i le afiafi o le Aso Lua o le vaiaso nei na faafuasei ona taofia ina ua faamaonia le aafia o le pailate i le siama o le faama’i. 

E faapea ripotia ua sauni le au malaga ma ua agai e siaki pe check in ae faasalalau mai loa e le auaunaga le tulaga o le faamaonia o le suega (test) a le pailate na taofia ai loa nei faigamalaga. 

Talu mai le Aso 8 o Aperila o le tausaga nei na ripotia ai e le Pulega o le Soifua Maloloina a le teritori le oo atu i le to’a 5,431 i latou ua aafia ma le to’a 12 ua maliliu ona o le faama’i.