Ua iai nei se talosaga mai le Minisita o le Matagaluega o Pisinisi Alamanuia ma Leipa, ua tuuina atu i le Minisita o Leipa a le Malo o Niu Sila, ina ia silasila pe mafai ona talia avanoa o galuega faavaitaimi i le polokalame nofomau o le Quota Scheme lea e avanoa ai tagatanuu e afe selau o Samoa ona maua le nofomau i Niu Sila.

Ua faailoa lea talosaga e le Minisita le tofa Leatinuu Wayne Sooialo i le polokalame o le Soalepule a le TV2, a o tālia le taunuuga o se iloiloga mo nisi aiaiga i avanoa o galuega faavaitaimi mo Samoa, ma faatalia foi le taimi e toe tatala ai le polokalame nofomau i Niu Sila.

O se isi o faafitauli o tagata talosaga i le polokalame lea ae talia, o le faigata ona maua pepa faigaluega ma o le mafuaaga lea o le talosaga e pei ona faaalia e le Minisita, ina ia mafai ai ona faafaigofie le maua o galuega mo i latou mai Samoa e faamanuiaina talosaga i le nofomau.

O le taimi nei ua toe faagasolo ona faia feuiuia’iga mo talosaga ua laki i le polokalame nofomau i Niu Sila mo i latou na taofia le faia o o latou pepa malaga ina ua manuia talosaga i le taimi na loka ai tuaoi faavaomalo ma lē mafai ona toe faimalaga ona o le vevela o le pipisi o le Koviti-19 i le silia ai nei ma le lua tausaga.