O le tamaitai o loo molia i le fasioti o lana fanau e to’atolu mai Timaru ae lei leva ona malaga mai Aferika i Saute e aumau i Niu Sila nei ua faailoa mai i lipoti ua toe suia nei le nofoaga e faia ai lona faamasinoga.
O Lauren Anne Dickason lea foi sa lipotia muamua atu i talafou na valaau i le faamasinoga maualuga i le Aso Faraile talu ai ma faamaonia ai ua talosaga lana loia ina ia suia le nofoaga e faia ai lona faamasioga i le tausaga fou, e aveese mai mai Timaru.
O le mataupu lea na feta’uaina ai le fasiotia e lea tamaitai o lana fanau, e 6 tausaga o le isi ma le masaga e ta’i 2 usaga le matutua.
O lona to’alua o le foma’i orthopaedic surgeon Graham Dickason lea na ia maua atu si ana fanau ua maliliu ma o loo taofia uma le faailoaina o faamatalaga e tusa o le maliliu o nai tamaiti. Ua faatulaga la o le tausaga fou e amata ai le faamasinoga o lea mataupu ma o loo feta’uaina o le faamasinoga maualuga i Kalaiesetete o le a faataunuuina ai.
