O loo tigaina nei i le falemai se tamā ua feta’ua’ina mai i lipoti sa faaoo iai manua e se tasi ma loka i totonu o lona fale i Brisbane ma tutu iai le afi sei tulou ae o loo iai faatasi ma lana fanau e toalua i totonu o le fale.
O tuaoi ma nisi na pasi ane i luma o le fale lea i Inglis St i Grange na latou faasaoina mai tamaiti ma taumafai e toso ese mai le tamā o tamaiti mai le nofoaga na sasao ane ai le afi seia taunuu atu le fesoasoani faavavave.
O le tina o tamaiti ma o le paaga a le tamā lea ua pue e leoleo e pei ona faailoa e le Alaata 7 ma ua faamatala e leoleo o se faalavelave e aofia ai sauaga i aiga.
O le faamatalaga a le leoleo suesue o Andrew Massingham ua ta’ua ai, e talitonu leoleo o le tamaitai lea e 44 tausaga le matua sa ia tatui lona toalua sei tulou e 42 tausaga e faaaoga ai se naifi a o taumafa le ipu kofe a le tamaloa i luma o le faapaologa o le fale.
Fai mai leoleo toeititi lava aafia le fatu o le tamā i lea osofaiga ma ua feta’ua’ina na loka ai e le tamaitai lea lona toalua i fafo ae ia susunuina nisi o aitema i totonu o le fale ae o loo iai le la fanau e toalua i totonu, e 11 tausaga ma le 9 tausaga.
Ta’ua e leoleo o le itu e faafetaia ai ona o le pasi ane o le tagata lea sa toleni ane i le taeao i luma o le fale, atoa ma tuaoi na faalogo i le feei ane ma vili ai loa leoleo.
O loo faatalia le taotoga o le tamā lea i le falemai i Brisbane, e lei aafia nai tamaiti ae o loo suesueina e leoleo le tamaitai sa ia faatupu lea faalavelave matuia.
