O le valaauina o le talosaga a Sam ma Sivai ua toe apili ai i le Faamasinoga Maualuga le faaiuga a le Faamasinoga Faaitumalo ua lē talia ai le tatala o i laua i tua ae faaauau pea ona nofo taofia i le vaaiga a leoleo, ua faailoa ai e le loia sa tauaveina le itu a lea ulugalii le tofa Lagaaia Fetu Iupati Lagaaia, lona faasee ese mai le toe avea ma loia mo Sam ma Sivai.
Ua sui atu nei iai le tamaitai loia o Josephine Fuimaono Sapolu ma Unasa Iuni Sapolu.
Ua toe tolo ai nei le suesueina o le talosaga apili a Sam poo Samuelu ma Sivai i le aso 22 o le masina nei o Aperila se’i tuu le avanoa ia la loia e tapena ai ma maua ai foi se latou feiloaiga.
I fafo o le potu faamasino na faaalia e le alii loia ia Lagaaia Fetu, ua mafua ona faasee ese mai le tauaveina o le itu a le ulugalii, ona ua iai se tusi faaseā a leoleo ua tuuina atu i le sosaiete a loia ua tuua’ia ai lona tagata i le taumafai e faalafi Sam ma Sivai.
O se tuua’iga o loo matuā teena malosi e le alii loia.
