E eseese taofi o le aumaimoa i le po anapo i le taaloga na saili ai le siamupini o le State of Origin mo le tausaga lenei 2022. E lē o toe po se lilo o le taaloga mata’ina na manumalo ai le Maroons mai Kuiniselani ina ua faato’ilaloina le Blues mai Niu Sa Uelese ina ua mae’a le taimi faatulagaina o le taaloga.
O finagalo faaalia o le aumaimoa e mātele nisi finagalo i le tulaga o le saogalemu i luga o le malae e pei ona atagia i nai minute amata o le taaloga ma le tele o tama taaalo na aafia ai ma ave i tua faato’ā amata le taaloga. Manatu nisi ua tatau ona faatulaga e le vaega o feagai ma le tuufaatasia o nei taaloga se faiga e malupuipuia lelei ai tama taaalo ma fautuaina foi i le ituaiga taalo e ao ona tausisi iai mo le saogalemu.
Faaalia e nisi o se taaloga uigaese lenei i le faasologa foi o ia taaloga ona o le tau fai malolosi o ‘au e lua ma le finau a tama taaalo ua tau fai lifi ai le taaloga i se isi foi maualuga e sili atu nai lo le tulaga e masani ona iai.
O le pa’ilima o tama taaalo i totonu o le malae e manatu nisi o le aumaimoa ua o se tulaga maualalo lea ua toe aumai iai le taaloga aemaise ua lē tatau ona toe tulai lea ituaiga vaaiga i le level poo le maualuga ua iai nei ia ituaiga taaloga.
E ui i lea o le manatu laualuga o se tasi lenei o taaloga aupito sili i le talafaasolopito o le State of Origin ma ua sola ai Kuiniselani ma le malo i ‘ai e 22 i le 12 a Niu Sa Uelese. Fai mai foi le tatou gagana masani, ‘e toe oso foi le la’. Mo Niu Sa Uelese, ia tālia ia i le tausaga fou e faamautu ai pe moni lea tulaga.
