E 50 leoleo mai le atunuu o Fiti ae 150 leoleo mai atunuu o Ausetalia ma Niu Sila o le a galulue i Samoa i le taimi o le fono a Malo o le Taupulega ae o loo iai foi se vaega o leoleo i Amerika Samoa ua sauni mo lea tautua pe a manaomia.
Ua faailoa lea fuafuaga i se lipoti a le leitio a Niu Sila ma ta’ua ai se finagalo o le Minisita o le Matagaluega o Leoleo Falepuipui ma le Fuataina le afioga Faualo Harry Schuster e faapea, e lē tatau ona iai se popolega i le itu i le puipuiga i le taimi o lea fono faavaomalo auā ua lava tapena tulaga uma mo lea vaega taua o le taligamalo a Samoa.
E tusa ma le 1,600 alii ma tamaitai leoleo o loo manaomia e galulue i tiute o le puipuiga i le taimi o lea fonotaga tele o le a auai taitai ma usugafono mai atunuu e 56 o sui o Malo o le Taupulega.
Ua faailoa i lea lipoti e na o le 900 le aufaigaluega o loo tautua nei i le Matagaluega o Leoleo Falepuipui ma le Fuataina.
O loo faagasolo i le taimi nei se aoaoga mo se tasi o vasega fou o alii ma tamaitai leoleo o le a faauu i le mae’a o ia aoaoga, ma o se isi faaopoopoga i le numera o leoleo o loo manaomia e galulue i le taimi o lea fono faavaomalo.
O se taimi muamua o le a talimalo ai se atunuu laititi o le Pasefika o se sui o Malo o le Taupulega, e ese mai ia Niu Sila ma Ausetalia sa talimalo muamua i lea fono taualoa.
