O le malelega a le afioga i le Ao Mamalu o le Malo i le sauniga na tatala ma amata ai polokalame o le 100 tausaga o le Kolisi o Avele, lea sa faia i le laumua o le kolisi i Vailima, na sa’afi ai lagona o le afioga i le Tama Aiga le afioga Tuimalealiifano Vaaleto’a Sualauvi II, i le maoa’e ma le maualuga o le sao o ē na a’oa’oina i totonu o le kolisi.
O lo latou sao e lē gata o galuega i le Malo ao upufai o lo tatou atunuu, aemaise ai o le atina’e o nuu ma afioaga ma aiga aemaise ekalesia eseese i le atunuu.
Se vaega o le malelega a le afioga i le Ao Mamalu o le Malo, afioga Tuimalealiifano Vaaleto’a Sualauvi II, i le sauniga na tatala ai polokalame o le faailogaina o le selau tausaga talu ona faavae le Kolisi o Avele, lea na amata o se puna’oa o a’oa’oga i tomai tau faatoaga.
Sa auai le ta’ita’i o le Malo le afioga i le tamaitai Palemia ma Minisita o le Kapeneta, o le Fofoga Fetalai ma sui Faipule o le Palemene, faapea sui o malo mai fafo, ma le sui o le Tupu mai le Malo o le Atu Kuki sa a’oa’oina i le kolisi o Avele ma lona faletua.
