Ua taualuga taualumaga a le fono aoao sa usuia i lenei vaiaso i le pasia o le lafo a le afioga i le Palemia, o le a su’esu’eina ai e le komiti o amioga taualoa ma tulaga aloa’ia a le Palemene, le ta’ita’i ma le sui ta’ita’i o le Itu Agai, faapea ma le faipule o Faleata 3 o sui usufono uma o loo agaia le malo.
O le saunoaga faaminisita a le Ta’ita’i o le malo na ia faailoa ai e silia i le luaselau faamaumauga ua mae’a ona tapena e le faigāmalo o loo iai upu lafo ma ni saunoaga a sui faipule ua tuua’ia, ua foua ai le malo, faapea le taufaaleaga.
O ni faamaumauga foi ua tuua’ia ai ma ni ofisa faasalalau e valu ae e le’i faailoaina e le Palemia susuga Laaulialemalietoa Leuatea Polataivao Fosi poo ai ia auaunaga faasalalau.
O se vaega lenei o le saunoaga faaminisita a le Ta’ita’i o le malo na faai’u i le faatūina o le lafo ua pasia mo le faia o lea su’esu’ega.
Le susuga Laaulialemalietoa Leuatea Polataivao Fosi le Palemia ma le Ta’ita’i o le malo i se vaega o lana saunoaga faaminisita.
Ua faailoa e le Fofoga Fetalai o le a silasila i faamaumauga ma faia ai sana faai’uga mo le isi laasaga e faatino, ae o le a faailoa lea faai’uga i le isi fonotaga a le Palemene.
O le aso 26 o Me ua tolopo iai taualumaga a le fono aoao faitulafono, ma o le tauaofiaga lea o le a faataatia ai ma le tala faatatau autū o le tupe mo le isi tausaga faaletupe e amatalia i le masina o Iulai o le tausaga nei.
