E ono faaitiitia aso e tatala ai le nofoaga mo tui I se tasi o lala I Aukilani seia vagana ua faaopoopo nisi o le aufaigaluega
E fitu aso I le vaiaso lea o loo tatala ai le nofoaga I Otara mo tui, ma e oo atu I le 100 tui I le aso e tasi e faia e le tausimai e toatasi
Saunoa ai le pule sili o le South Seas Health Care I tala a le Herald, Lemalu Silao Vaisola-Sefo, o le nofoaga mo tui I Otara na muai faatu e faia ai tui e tusa ma le 300 tagata I le aso, peitai o le tele o aso e latalata I le 400 tagata o loo faia o latou tui, ae na o le toafa tausimai
O le masina o Iulai lea e faapea faatoa faaopoopo ai le fuainumera o le aufaigaluega, peitai e foliga mai ua tuai
O loo lagolagoina foi e le pule sili o le Health Star Medical Centre, Vaifagaloa Naseri le manatu o le moomia o nisi tagata galulue e faia tui, sei maua ai sina mapu a I latou o loo galulue I le taimi nei
O le utiuti o le aufaigaluega, ua sau ai ma le manaoga o loo moomia nisi tagata Pasefika e mafai ona galulue mo le faia o tui o le lautele o le atunuu
O le masina fou lea ua faailoa e le vaega a le soifua maloloina e maea ai toleniga a nisi o le aufaigaluega, ma saunia ai mo le afa lona lua o lenei tausaga
