I se lipoti lata mai o le taua i Iran ua faailoa ai le faia o ni osofa’iga fai faatasi a Iran ma le vaega a le Hezbollah e faamautū i Lepanona, faia faasaga ia Isaraelu.
Ua lipotia e le CNN le faaauau pea ona siitia o le numera o tagata maliliu mai lenei taua i Sasa’e Tutotonu.
O le ta’ita’i fou ua iai nei o Iran o Mohtaba Khamenei na iai ona manu’aga mai le ulua’i osofa’iga a Amerika ma Isaraelu ia Iran ma e le’i vaaia lava i nofoaga faitele ma e le’i tuuina ane foi se faamatalaga mai ia te ia talu ona filifilia e avea ma ta’ita’i fou o le atunuu.
O se tasi tulaga ua lipotia mai e le CNN o le sootaga lea o Iran ma Lusia, lea e faapea o loo fautuaina e Lusia Iran i metotia tau le faaaogāina o drones ma o loo fesoasoani ia Tehran i ana osofa’iga i nisi o atunuu i Sasa’e Tutotonu lava.
Ua faailoa e Amerika ua o latou faaleagaina vaa a le Navy a Iran e lata i le Strait of Hormuz ma o loo faaauau pea fetauiga i lea itu o le lalolagi.
Puna o Faamatalaga: https://edition.cnn.com/2026/03/11/middleeast/us-israel-iran-middle-east-war-what-we-know-intl-hnk
