I le Aso Faraile ua mavae le aso 13 o le masina o Mati na tuuina atu ai le tusi talosaga mai suli o le suafa Toomalatai i le afio’aga o Matautu i Apia i le Pelesetene o le Faamasinoga o Fanua ma Suafa e taofi ai le faaaogāina o le suafa Tuisinavemaulumotootua i le faafotutupu o le Palemia o Niu Sila, e oo mai i le Aso Sa ua mavae atu nei e le’i maua se tali o lea talosaga e pei ona faailoa mai e se tasi o le aiga.
O le Aso Gafua lenei i Samoa o le a faatino ai le faafotutupu o le alii Palemia o Christopher Luxon o se tasi o vaega muamua o le polokalame o lana asiasiga faalemalo i Samoa.
O loo faaalia i le tusi talosaga e taofi ai le faaaogāina o le suafa, e le’i iai se maliega o suli e faasino tonu iai le suafa matai.
I le polokalame o loo faailoa ai o le a taunuu le Palemia o Niu Sila ma lana aumalaga i lumāmaota o le malo i le eleele fou ona asiasia lea o le tula’i faaaloalo a leoleo, sosoo ai ma le ‘ava o le feiloa’iga lea o le a faaee ai ma le suafa matai.
E sosoo ma le sainia o ni maliega poo Memorandum of Understanding se tolu i le va o le Palemia o Niu Sila ma le Palemia o Samoa le susuga Laaulialemalietoa Leuatea Polataivao Fosi.
O le aoauli i le te’a o le 2 e auai le Palemia i le tatalaina o le maketi fou i Savalalo ae taualuga le aso muamua o le asiasiga faalemalo a le alii Palemia i se tali faaaloalo o se taumafataga o le afiafi e faia i le faletalimalo o le Taumeasina Island Resort.
