Ua lapataia tagata Niu Sila ia mataala i nisi faiga taufaavalea o loo faaaogā ane ai le telefoni ma faapea mai o latou o leoleo, ina ia taufaasese ai tagata ma a latou tupe.

O le lapataiga ua faailoa mai i le mae’a o ni lipoti ua ta’ua ai le iai o nisi ua aafia ai ma a itiiti mai e toalua na tagata matutua i Aukilani ua ma’umau ai le faitau afe o tupe.

O le satini sinia o Ryan Bunting na ia faailoa i le lipoti a le One News e tele ina faaaogā ane e le autaufaavalea ia telefoni fale ma fai ane o latou o leoleo ma latou te faaaogāina ni ID taufaavalea e faatalitonu ai tagata.

O le a o latou faatonuina tagata e tala ane ni tupe mai bank ma tuu i se tasi o le a agai atu i o latou fale e aoina mai ia tupe, o isi faamatalaga ua ta’ua ai latou te fai i tagata o loo iai ni faaletonu ia latou credit cards.

Fai mai o nai tagata e toalua e pei ona ta’ua sa o la tala tupe mai le faletupe ma ave i le tagata na alu ane e ao e pei ona faatonuina ma ua faailoa e leoleo o loo ofoina nei iai le fesoasoani.

Ua poloaiina foi tagata afai e oo atu se valaau faapea ia latou telefoni, ia vave tapē ma vili le laina 105 a leoleo.

Puna o Faamatalaga: https://www.1news.co.nz/2024/06/13/kiwis-asked-to-be-vigilant-of-scammers-pretending-to-be-police