O le minisita o le va I fafo a le atunuu, Nanaia Mahuta ole a fai ma sui o Niu Sila ile fonotaga a le NATO ile vaiaso nei e faia I luga o upega o fesootaiga ao faaauau pea ona aliae mai nisi ata o tulaga faigata ma tulaga ese o iai Ukraine mai osofaiga a Lusia.

O le NATO le North Atlantic Treaty Organisation,ose faiga faapaaga tau militeli na faatuina ina ua maea le taua lona lua o le lalolagi .O le 2016 na aofia atu ai ma atunuu o Asia ma le Pasefika ma faia ai le uluai fonotaga a minisita o le va I fafo a atunuu ile masina o Tesema 2020. O i lea na aofia atu ai ma Niu Sila ae ua autausaga o galue Niu Sila mo le NATO.

Faailoa e le newshub o lea la ua valaaulia paaga faavaomalo a le NATO  e auai I le fonotaga lea a minisita o le va I fafo I lona ofisa i Brussels e faatalanoa ai se tali atu I osofaiga a Lusia ia Ukraine.

Faamaonia la e le ofisa o le va i fafo ole minisita o le a fai ma sui o NIu Sila I lea fonotaga. O isi atunuu ole a auai e aofia ai Ausetalia, Iapani, Korea, Sweden ma  faapea foi ma isi atunuu I le atu Europa ma le Iuni a Europa ma ua taua o le a maua ai foi ma se avanoa e talanoa ai i luitau tau le puipuiga o feaga ai ma lenei itulagi.