I le silia ai nei ma le 150 tausaga talu ona faavae le A’oga Telosia poo le kolisi faafaifeau a le Ekalesia Katoliko i Samoa lea na amata i Savalalo i le tausaga e 1871, siitia i Lalovaea ma taunuu atu ai i le nofoaga ua iai nei i Moamoa, ua to’atele alo ma fanau a lea ekalesia ua faafailele ma a’otauina ai mo le galuega tala’i ma faauu mai ai mo le galuega a le Atua.
E 3 miliona se tupe ua sailia e le ekalesia e toe fausia ma faafou ai maota uma o le Kolisi Telosia i Moamoa e aofia ai ma le Malumalu ua 80 tausaga o faaaogā. I se feiloa’iga ma sui o se komiti ua filifilia mo lea faamoemoe na faailoa ai e le ta’ita’ifono le afioga Tuiaopo Andrew AhLiki le fuafuaga ua finagalo iai Le Tamā o le Pule’aga le afioga i le Aki Epikopō, Alapati Lui Mata’eliga ma ta’ita’i o auaunaga eseese a le ekalesia katoliko i Samoa.
Le afioga Tuia’opo Andrew AhLiki o le ta’ita’ifono o le komisi ua feagai ma le sailia o le 3 miliona mo le toe fausia ma faafou maota uma ma le Malumalu o le Kolisi Telosia i Moamoa. Ua talosagaina ai e le komiti alo ma tamafanau uma a le ekalesia i Samoa ma atunuu i fafo faapea uo ma paaga a le ekalesia i se foai tupe mo lea faamoemoe tāua.
