O le talimalo o Samoa i le amataga o lenei vaiaso i le asiasiga taualoa a le Palemia o Niu Sila ma faatino ai se tasi o faaaloalo maualuga ia tatou tu ma aganuu o le faaeeina o se suafa matai i lea ta’ita’i faalemalo, ua fesiligia ai pe moni o lea faaaloalo maualuga a lo tatou malo ma le atunuu sa māfua ona o se molimana’o mai le Palemia o lea malo.
Ua māfua lea tulaga ona ua teena e le ofisa o le Palemia o Niu Sila faapea ma le ofisa o le Komesina Maualuga o lea malo i Samoa le iai o se molimana’o mo le faia o se faafotutupu.
Ua faailoa i lipoti le teena o le iai o se molimana’o o le Palemia o lea malo i sona suafa matai ina ua lipotia ai se finagalo o le Palemia o Samoa lea sa ia faailoa ai le oo atu o le sui o lea malo i lo tatou atunuu ma faailoa atu le molimana’o.
Le finagalo o le afioga i le Palemia susuga Laaulialemalietoa Leuatea Polataiavao Fosi i le polokalame o le fofola le fala ma le Palemia i le Aso Faraile ua mavae.
I le faafotutupu ua fuafuaina o le afiafi o le Aso Sa na feiloa’i ai alii ma faipule o le nuu o Matautu i Apia ma matai o le afio’aga o Apia e soalaupule le matāupu.
Ua faailoa ai e se sui o le aiga i Matautu o le a solitu le afio’aga e lē auai pe afai e faaauau le faaaogāina o le suafa.
