I le Aso Lua o lenei vaiaso na tuuina atu ai i le Palemene le tulafono taufaaofi ina ia faavae le pulega fou e gafa ma le vaaia o atina’e o itumalo; ma o le 18 minute e te’a ai le 6 o le afiafi o le Aso Tofi na pasia ai e le Palemene lea tulafono.
O felafolafoa’iga i finagalo o faipule o le Itu Agai ma faipule tuto’atasi sa molimauina e mamafa i le fesiligia o aiaiga o le tulafono e faasino i le filifilia o ta’ita’ifono o komiti o Fono Faavae e pei ona suia ta’iala mo lea tulaga.
O isi aiaiga sa fesiligia o le filifiliga o sui o komiti, ma le tulaga o le tuuina atu i le Fono Faavae o le faagaioia o nisi o fesoasoani a le malo e pei o tupe mo le faaleleia o a’oga.
Faaopoopo iai ma le vaega o le lotoifale e faasino i le faafoeina o galuega a sui o nuu ma sui tama’ita’i ua i totonu o lea pulega fou na te vaaia ma pulea.
O le pasia ai o lea tulafono taufaaofi a le malo o le a aveese ai le pulea o le poloketi miliona mai le Matāgaluega o Tinā ma Tama’ita’i, Atina’e o Afio’aga ma Aga Fesoota’i.
O le pulega o atina’e o itumalo o se auaunaga fou a le malo o le a faaopoopo i matāgaluega, o faalapotopotoga ma isi pulega a le malo.
