O le faitau aofai o tagata i Samoa, ma le tulaga o loo iai le tamaoaiga o le atunuu o ni vaega tāua tele lea e ao ona toe silasila iai le Palemene ma le Malo i le toe faatulagaina o le aofai o nofoa o le Palemene i le lumanai ma le toe faaono vaevae ma fetuunai itumalo faapalota e fuafua i le aofaiga o tagata o nonofo ai ma fuafua foi i le numera o tagata palota o loo lesitala i lola palota a itumalo faapalota taitasi.
O le tasi itu tāua e tatau ona toe silasila iai o aiaiga o le 10 pasene o loo autu i le faatoateleina o le numera o tamaitai e avea ma faipule o le Palemene.
I le lipoti a le Komisi Suesue o faigapalota, o loo faailoa ai se ata faataitai e fua iai se numera maoti o nofoa o le tatou Palemene i le lumanai e pei ona aumai ai faamaumauga o le faitau aofai o tagata o nisi o atunuu tu lalata mai o le Pasefika, ma le aofaiga o tagata o loo faamautu i se itumalo palota ma le aofaiga o nofoa o Palemene o ia atunuu.
O Samoa i le paeaiga o iai nei a le Palemene e 53 nofoa o le Palemene lea e aofia ai le 51 o nofoa o itumalo palota ae 2 nofoa o faipule tamaitai i aiaiga o le 10 pasene, e fua lea i le faitau aofai o le atunuu o loo iai nei e 205,557 ae o le aofai o tagata o nonofo i se itumalo palota e i le va 4,031 ma le 3,878.
A fua atu ia Vanuatu e 6,225 tagata o loo mau i le itumalo palota ae o le faitau aofai o lea atunuu e 323,712 o le aofai o nofoa o le Palemene o Vanuatu e 52.
A sōsō atu atili i le atunuu o Solomona e 725,767 lona faitau aofai, 50 nofoa o le Palemene ae 14,515 tagata o loo nonofo i se itumalo palota.
O Fiti e 55 nofoa o lona Palemene, 16,416 tagata i se itumalo palota ae o lona faitau aofai e 902,899.
I auala e tolu ua fautuaina e le Komisi Suesue i lana lipoti, o loo faailoa ai i se tasi o fautuaga a fua le faitau aofai o le atunuu mai lana tusiga igoa mulimuli o le numera o nofoa o le Palemene e tatau ona iai e 45, ae a faaauau pea le 6 nofoa mo tamaitai ona maua lea o le 51.
O loo aumai lea fua a le Komisi Suesue i le toe fetuunai o nisi o itumalo palota ma faaopoopo iai nisi o nuu ma afioaga ina ia maua se aofaiga o tagata e tau maua ai se fua tutusa o le numera o tagata o nonofo ma faamautu i isi itumalo.
Ua fautuaina foi e le Komisi Suesue afai ae faatupulaia pea le numera o tamaitai e avea ma faipule e ao loa ona silasila e ta mau le numera o nofoa o le Palemene i le 45.
O le toe tepa i tua i le faatoa filfilia o sui faipule o itumalo mo le Fono Aoao Faitulafono o le tausaga e 1963 na suia ai le aofai o nofoa mai le 45 i le 47, oo mai i le tausaga e 1991 ua 49, ae taunuu mai i le tausaga e 2019 ua sii mai i le 51 e ese mai ai nofoa faaopoopo e lua o sui tamaitai i lalo o aiaiga o le 10 pasene lea ua 53 ai nei nofoa.
