E lua ni faalavelave tau taavale na tutupu i le tausaga na te’a nei, o lea ua faia iai faai’uga a le faamasinoga sili a le atunuu, ma ua nofosala ai i le falepuipui avetaavale, ina ua faamaonia moliaga o le avetaavale mata’utia ma le faatamala ua maliliu ai ni tagata, ae manunu’a ai isi o tagata o pasese sa malaga i ia taavale, a o isi o tagata savavali i le auala ma nisi sa nofonofo i le aualatele.
O Aokuso o le tausaga ua mavae na tulai mai ai i Leusoalii i Luatuanuu se faalavelave tau taavale i le vaiaso tonu o loo tapena le Aso Sa o Tamā. O se faalavelave na sopo’ ia ai e le tasi o taavale le taavale sa pito i luma, ma faasasa’o atu feto’ai ma se laau o le pulu i autafa o le auala lata i le sami. Na oso ai i tua le taavale sa aveina e Setu Alapati o loo agai i Aleipata ina ua lata atu i se pi’oga ae fetaui ma se isi taavale o loo aga’i mai i Apia.
Na maliliu ai ni tina se to’alua sa malaga i le taavale a Setu ua nofosala i le falepuipui mo le umi 3 tausaga ma le ono masina. O le tasi o tina na maliu o le to’alua o lē ua nofosala, ae o le tasi tina o le to’alua o le uso o lē ua nofosala. O le isi faalavelave tau taavale na tupu i Pu’apu’a i Savaii, na oso ai i tua le taavale ma aafia atu ai ni alii talavou sa nofonofo i lea vaega o le auala a o matamata i se Tausala a se aulotu i le po.
O lē ua faasalaina i le 2 tausaga ma le 4 masina o Mu Vaamainuu. Sa mānava i lana galuega i Salelologa ona aga’i lea ma sana uo ua inu i se falekalapu i Salelologa, poo le 9 i le po na aga’i ai loa i lo latou aiga i Samalaeulu. Peitai na moe a o ia faafoe le taavale ma oso ai i tua lona Sa ma aafia ai ni alii se to’afā. O le isi ua maliu ai i le faalavelave ae o le isi to’atolu na taofia i le falema’i mo togafitiga mai manu’a tugā. O faalavelave uma nei e lua sa aafia ai le avamalosi.
