E lē faigofie ona filifilia i latou e faaulufale o latou suafa i totonu o le li’o o tagata Ausetalia ua iloga ma ta’uta’ua o latou suafa i taaloga i totonu o le atunuu, peitai o lea ua ofi i ai le suafa o le alo o Samoa, le alii talavou o Tim Cahill, ma ua faaulufale ai nei lona suafa i le lisi o i latou o ni tagata taaalo ta’uta’ua a Ausetalia, le Sports Australia Hall of Fame i Melepone.

O le alii o Timothy Filiga Cahill poo Tim Cahill ua lauiloa ai, o le alii ua ta’uta’ua i Ausetalia i le taaloga o le Soka, e pei ona sa taalo ai faapolofesa i le ausoka a Ausetalia le Socceroos.

Sa taalo Cahill i le tulaga o le forward, midfielder ae tele foi taimi na taalo ai i le tulaga o le striker, ma sa iloga lenei alo o Samoa, i le malosi o lana osofai pe a oo ina taumafai e momoli le polo ia sao i totonu o le neti poo le ogaumu.

E faa-108 ona taalo Cahill mo le ausoka a Ausetalia mai le 2004-2018; e 50 sikoa na ia faaofi ai le polo i le ogaumu, ma o se matatia foi lea i totonu o Ausetalia, ma le fā Ipu a le Lalolagi o le soka (FIFA World Cups) na taalo ai Cahill lenei alii.

Ua malolo litaea Cahill mai le taaloga soka, ae lē o faagaloina e le faalapotopotoga o taaloga a Ausetalia le suafa sa ta’uta’ua ai Ausetalia i lana ausoka i le lalolagi.

O Tim Cahill ua 44 tausaga o lona soifua, ma na soifua mai i lona tina o se tamaitai Samoa, o Sisifo Belford mai afioaga o Tufuiopa i Apia ma Salailua i Savaii.